MARSIURUPAN MA NASIAM !

Marsiurupan ma nasiam mamorsan naborat in,

ai marhiteihon ni in idalankon nasiam do titah ni  Kristus

(Gal 6: 2)

Pasai marsiurupan on, boi do hita marlajar humbani tinompa ni Naibata aima porkis (semut). Age sonaha pe borat ni sibobanon ni sidea , tapi  sir-sir do sidea marsiurupan atap bekerja sama.Lang egois, lang marsibahen-bahen ni. Halani ai  parlajaran atap contoh  na dear do na sonon on banta.

Banta halak Simalungun pe  domma dokah itanda hita istilah marsialop ari” bani kehidupan sehari-hari.Misalni,  nantuari  marhorja hu juma ni  si Aman, sadari on hu juma ni si Bosar, patar use hu juma ni si Cami pakon satorus ni. Hal na dear do homa na sonon on. Saling marsiurupan  manghorjahon na borat in.Dear do tong ase totap ilestarihon hasomalan na sonon.

Halak na lang sir-sir mandalankon ai, boi do tarpunjung  itongah-tonah ni pargaulan bani masyarakat.Atap gati isobut  songon “tanggiang na tarpulou”.

Paulus  mangidah bani panorang ai pakon bani panorang  sondahan on buei tantangan pakon beban na borat na ihadapi, misalni: beban sosial ekonomi, pasal niombah, hamateian, pakon na legan.. Halani ai porlu marsiurupan  mamorsan na borat in, saling berbagi, saling menolong. Lang pitah marhiteihon ni hata tapi dihut marhiteihon ni pambahenan na kongkrit. Mase porlu idalankon hita na sonai ai? Halani sebagai halak Kristen  marsiurupan marupahon keharusan mamorsan na borat in. Marhitei bukti na sonin in do  hita mandalankon titah ni Kristus. Halani  inti ni titah ni Kristus  aima saling marsihaholongan pakon saling  mangidangi.

Mase porkis  salah sada tinompa ni Tuhan in sir-sir marsiurupan mamorsan na borat  in, sementara hita jolma na tinompa sigijangan na ibere  uhur pakon pingkiran  lang sir-sir marsiurupan? Anggo lang  be sir-sir hita marsiurupan  mangurupi hasoman na legan, na sangat membutuhkon pangurupion jolma na sonaha ma goranon  hita ijai? Ham, au, hita sandiri ma marbalos pasal ai. Tapi hata ni Tuhanta banta bani panorang on, ase marsiurupan ma hita.!

Tonggo: Tuhan Jesus, ajari janah pargogohi Ham ma tong-tong  hanami ase totap idalankon hanami titahMu marhitei na sir-sir hanami marsiurupan.

Pdt. Jahenos Saragih


HAGOGOHON AMPA HASANGAPON  BANGGAL

Dob ai idahon ni sidea ma Anak ni jolma in roh marhitei

hombun ibagas hagogohon ampa hasangapon  banggal

(Lukas 21: 27)

Minggu na roh on sesuai hubani tahun gerejawi, masukanta adven na patoluhon. Hal on mararti maningon sirsir ma hita mangevaluasi goluh hakristenonta, apakah domma iparsiapkon hita galohta menyambut Jesus Kristus na gok ibagas hagogohon pakon hasangapon banggal secara historis (sejarah) sekitar dua ribu tahun na salpu i Betlehem atap secara eskhatologis aima bani penyambutan parroh ni Kristus na paduahalihon ai ?

Secara historis na tarjadi dua ribu tahun na salpu pasal hagogohon ampa hasangapon na banggal aima lang pitah warga dunia na marmalas ni uhur mamuji-muji pasangapkon Tuhan Naibata, tapi dihut do warga na gori atas aima malekat pakon balaNi (Lukas 2:14)

Bani proses pelayanan ni Jesus (Anakni Jolma in} selanjutni ai ma laho paluahkon jolma in janah  paima iparsilangkon Ia, domma ipagolpa, bahasa dob honsi matei pakon mulak manggoluh Ia, naik hu surga, roh doh Ia use paduahalihon ibagas hagogohon  pakon hasangapon banggal in. Janah paima ai ibahendo tanda-tanda zaman, na lang ongga ope tarjadi. Masa paima-imahon ai ma goluhta panorang on. Janah sasitongni anggo botul-botul do isadari hita , sanggah bani goluhta sonari on pe domma ididah pakon isaksihon hita hagogohon ampa hasangapon banggal na dob ibahen Tuhan Naibata bani dirinta , keluarganta, gereja, bangsa pakon negara on . Tapi gati atene  haganupan na masa in  nini uhurta pitah halani hagogohon pakon hapentaranta sandiri do mambahen terjadi  ganupan in.Dob ni jadi sombong pakon angkuh hita bani goluh on, lupa hita bahasa goluhta  pitah parsatongkinan do hansa.

Halani ai, minggu advent  on ma panorang banta mangevaluasi diri janah sir-sir pakon terbuka ilobei-lobei ni Tuhanta in, ase ididah hita  holi  anak ni Jolma in roh marhitei  hombun ibagas hagogohon pakon hasangapon banggal. Dob ni riap janah  masuk ma  hita  hu rumah na totap  ronsi sadokah ni dokahni.Ulang tading ilobei ham holi. Persiaphon ham ma dirimu, keluargamu ase rap sonang hita  bani hagoluhan sisadokah-ni dokah ni ai.

Tonggo: Ajari pakon pargogohi Ham ma hanami Tuhan  boi mangidah pakon manada hagogohon pakon hasangaponMu in  sonari  pakon si magira ai. Amen

Pdt. Jahenos Saragih